كتبت هذه القصة فى شكل سيناريو... ن/خ: تعنى نهار خارجى
ن/خ,المكان :مترو الأنفاق ,عربة السيدات
تجلس نفيسة على احد المقاعد.. الساعة حوالى الحادية عشر صباح الجمعة , المترو خالى تقريبا من الركاب و الهدوء يعم المكان.فجأة يصعد رجل إلى العربة ,تسرع نفيسة فى لفت إنتباهه أنها عربة سيدات فيرد مستهزأ:" ما أنا عارف"
تلاحظ على وجهه اللامبالاه:" أنت حر , بس كده هتاخد مخالفة."ء
"و انت مالك "ء
"من فضلك متتكلمش معايا بالأسلوب ده ما تنساش انك بتكلم ست."ء
" ست!! ست مين!! إنت إيه اللى ركبك أصلا هنا!!!!."ء
يحاول الركاب تهدئة الوضع و الدفاع عن نفيسة و لكنها تغضب جدا
" طب كويس إنك عارف مين اللى بيركب عربية الستاااات ..أكيد اللى بيركبها مش رااااجل."ء
"مش راااجل!!!"
ينظر لها بمنتهى الغضب و فجأة نسمع صوت لكمة
CUT
ن/خ
نفيسة جالسة فى المترو نرى على وجهها أثر لكمة بالتحيد عينها الشمال....يفتح باب المترو و يدخل صبى فى ملابس رثة ,نسمع صوته الذى يدل على خبرته الطويلة فى سوق الباعة الجائلين , يبدأ فى توزيع بضاعته
" يلاااا يا أبلة اللى عايز نعنشة, نعناع يروق الدم يعطر الفم و بنس كنيه."ء
و يأخذ فى إلقاء بضاعته على حجر الركاب... يبدو على وجه نفيسة الضجر كلما حان وقت رشقها بالنعناع.. تشاور بيدها له معلنة عدم رغبتها فى الشراء, يرمى لها نعناع رغم ذلك
"قلت لك مش عايزة ."ء
"هاجى أخده منك دلوأتشى يا أبلة."ء
" أنا نازلة المحطة اللى جاية,أمسك"ء
"طيب يا أبلة بوراحة شوية,ده إيه الأرف ده"ء
"احترم نفسك"ء
تحاول سيدة تهدئة الوضع و لكن الصبى يغضب:"احترمى نفسيتشك إنتشى الأول"ء
"أنا محترمة يا قليل الأدب"ء
CUT
يفتح باب المترو و تنزل نفيسة و حول عينها بقعة بنفسجية مستديرة
CUT
نفيسة فى المترو ,تضع على عينها اليمنى بلاستر و عينها الشمال لا تزال وارمه.. تدخل فتاة الى المترو و تجلس بجوار نفيسة ..تفتح نفيسة كتاب و فجأة تسمع صوت فنان شعبى صوته يخرج من موبايل , يأخذ صوته الغربانى فى الإرتفاع كلما حاولت التركيز فتطلب من الفتاة خفض صوت الموسيقى فتفعل, بعد دقائق يعلوا صوت الأغنية مرة أخرى فتطلب منها فى هدوء خفض الصوت فلا تعيرها اهتمام
"على فكرة أنا مش مرغمة ان حضرتك تسمعينى اللى بتسمعيه!!"ء
"يعنى أعملك إيه؟؟"ء
"حضرتك ممكن تحطى سماعات فى ودنك"ء
"معنديش"
"يبقى إقفليه"ء
"لأ مش هقفله ولا هو يعنى لازم أشغل قرآن عشان يعجب!!!!!"ء
"ولا قرآن ولا ترانيم و على الأقل القرآن مش زى القرف ده"ء
يجتمع الناس على تهدئة الطرفين:"لا حول ولا قوة إلا بالله.. إستهدوا بالله يا حبايبى ميصحش كده انتوا مش صغيرين"
ترد الفتاة بغضب شديد:"مغلطش اللى شلفطلك وشك"ء
CUT
فى المترو نرى فتاة تتشاجر مع بائع جائل ألقى عليها نعناع نعنشة.... يجلس أطفال يتنطتون بجانب أمهاتهم على الكراسى و يقف أمامهم سيدات كبار السن..فى الخلفية نرى نفيسة واقفة وارمة الوجه مكسورة الدراع..فى احد جوانب المترو يقف ضباط شرطة المترو يضحكون على مشاجرة الفتاة و البائع ... سيدة تلقى بقمامتها من الشباك و نسمع صوت قرآن و فجأة أغنية لعمرو دياب.. يبدأ صوت الفتاة يعلوا أكثر فأكثر ,نرى نفيسة تقف صامتة ... يقف المترو و تنزل نفيسة و هى تعرج.....من شباك المترو نرى تلفزيون عليه أغنية مليئة بالفتيات و يقف تحت التلفزيون أولاد و رجال علقت أعينهم على الشاشة و فجأة يعلوا صوت ترانيم مع الأغنية مع القرآن و يعلوا معهم صوت الفتاة و البائع..نرى نفيسة تبتعد من المحطة شيأ فشئ و بجانبها يمر متسول مقطوع القدمين يشحذ من مجموعة من السياح و رجال يقفزون من فوق ماكينات التذاكر ..تختفى نفيسة عن أنظارنا و نسمع صوت الفتاة :"أنت قليل الأدب"... يصمت كل شئ و فجأة.. نسمع صوت لكمة
8 comments:
لاء.... حقيقي لاء و ألف لاء
ما هذه العظمه يا نفيسه يا بنت كوبس...وانا اقول ياربي بتغيب علينا ليه في كتابه المواضيع...اتاريها يا حرام كانت مشغوله بتاخد كورس ... في "التأهيل المهني" وبعدين يابنت كوبس اخيرا عرفنا اسمك "نفيسه" انما علي رأي عادل امام "ده حساسيه ولا نمتي وصحيتي لاقيتي نفسك نفيسه؟"
ما شاء الله عليكي...انا لولا إني متأكده إن حسن الامام مات كنت قولت ده فيلمه الجديد
بس عارفه ناقصه شويه اثاره...يعني و نفيسه بتاخد البوكس الاولاني يكون في الخلفيه صوت رعد و برق ومطره بترخ من الشباك المكسور للمترو..طبعاً لانه فيلم عربي ..نفيسه لازم تكون لابسه صيفي خالص ..ولو عرفتي تعديها من الرقابه لبسيها مايوه حشمه شويه..علشان كمان الدم ما يوسخش الفستان.
وبعدين ممكن تزودي جرعه الاكشن شويه..يعني نسمع صوت زحلقه و تزييق كاوتش عربيات و نشوف سواق امترو بيطارد بياع النعنشه علي جبل المقطم ..و برضه لان الفيلم عربي فطبعا العربيات لازم تكون ١٢٨ و سرعتها ما تزيدش عن ٢٠ كيلومتر في الساعه...و اوعي تخلي البوليس ييجي الا في آخر الفيلم وتخلي الظابط يقول في النهايه الجمله اللي تفقع المتفرجين "ما فيش جريمه من غير عقاب.. وقعتي يا نفيسه" وما تنسيش لانه فيلم عربي..البوليس ييجي من غير ما حد يستدعيه
حاتقوليلي طيب لما سواق المترو يركب ١٢٨ ويطارد بيها الواد بتاع النعنشه امال مين اللي كن سايق المترو؟؟؟ اقولك هنا الحبكه الدراميه للفيلم واخده بالك انتي لانو لازم المتفرج يشغل مخه و يسأل "هما ليه شالو وزير النقل و المواصلات؟؟؟؟"
كوبس ايه بقي..هو فيه مترو بيشتغل بكوبس؟ احنا حنغير إسمك إلي "نفيسه بنت دينامو"
و سمعينا وحياتك سلام
زحمه يادنيا زحمه
زحمه وتاهو الحبايب
زحمه ولا عادش رحمه
مترو و سواقه غايب
:D:D:D wish i were nefisa:D:D:D 3al 2a2al kont hab2a ba3tared bra7ty:D:D:D:D:D w mosh mohem el darb....3al2a tfoot:D:D:D ana bafakar a3ml film moshtarak ma3aki teftekri nsamiih eh:D!!!:D:D:D
الله ده كده الموضوع "لامؤاخذه" يبقي واخد دور نداله بقي
يعني لو سلمنا جدلا ان انتي مش نفيسه يبقي حضرتك
سيبتي الغلبانه تاخد بوكس في العين اليمين ماشي ..وبعدين
تتفقع لها الغين الشمال..برضه ماشي...لكن توصل لكسر الايدين
ده فيه ناس عندها حبن بشكل "قصدي جبن ابيض فلاحي كامل الدسم" وقاعده كل البُنَيه ما تاخد عاهه تعملي انتي
CUT
لا فيكي الخير...و بعدين عين ازرقت و عين طارت و دراع اتكسرت..يعني الست نفيسه بقت من ذوي العاهات و المعوقين
وكل ده بتعتبريه علقه تفوت ولا حد يموت؟؟؟؟
ما فيش مانع نعمل فيلم مشترك ...بس نتفق الاول مين فينا اللي يضرب و مين اللي ينضرب يا نفيسه؟؟ يوووه نسيت انك مش نفيسه
يا تري ممكن تكوني مين..مين..مين...آيوه عرفت...اكيد الاسطي عبده سواق المترو
اما اسم الفيلم فواضح ان خيالك ماشاء الله مقاس ٤٤ يعني اختاؤي انتي وقديما قالوا لا يفتي و فيشه في البريزه
كما قال اهل الفقه اذا حضرت فيشه بطل المفتاح
وكما قال الاحنف امير الشعراء
تمأمأت شطر الشناخف برظطة
فنام كل الذي في الحناشل قد روى
وتسلعفت ذات البلاطق بهشطة
فذاك الذي تنح من وجاوج والهوى
شيح وخمبور ومتن لامق خرخطة
لا ضو ولا من هوفه تشلخف الورى
و سمعينا سلام كوز المحه اتخرم
اديله بونطه لحام
لفت نظري لمدونتك اسمك
هههه عجبني
ولما جيت لقيت مدونة شيقة وقلم واضح انه دارس
حلوة القصة اوي
وفعلا ده حال اي شيء نفيس في حياتنا او شخص بيحاول انه يكون صح رغم انف الللي ماشين غلط
تحياتي
3a2la gedan:DD:D:D:D enty mota2akeda en el esm da msh moddad l esmek el 7a2i2i:D:D:D;D;D:P:P:P........@ fekra mn el zaman da...rabna ykremek ya fandem ashkorik da mn zo2ek:):)
بالطبع لا~ آن آن آن~ موسيقي تصويريه
من فيلم محمد عبد التواب وعاليه ابراهيم بتاع
"متاكليش ايس كريم علشان الدنيا برد" في جليم
والسبب يا أبنه كوبس وهو ما اثبته اخونا فيثاغورث
أنه لا تعارض البته "يا نفيسه" بين اسم "عبقريه" وبين
اسم "عاقله جداً"
وسمعينا سلام "كايده العزال يا... بيومي"
الله يعين نفيسة على الزمن ده .. قصتها اعتقد أنها مكررة ولكن مع اختلاف الأسماء والأمكان في العالم العربي.. دمتي بكل ود
شكر الى الشجرة الأم و فعلا كلنا نواجه هذه المواقف..دمتي بكل ود:)
Post a Comment