آه يا دماغى

آه يا دماغى آه و آه
السور ده مين اللى بناه؟

شعوب ساكته و مأنتخين
ولا حكام مش بنى آدمين
ولا أفكار مستعمرين

ولا يمكن فلسطين


آه يا دماغى آه و آه
حارق فى قلبى السور و الله

فاكرين كده حرية و هنا
متحبسش غير اللى بنا
و أول رصاصة جت فى الضنا

حرام ولا حلال يا كبير



آه يا دماغى آه و آه
تعليم و صحة "أوه لا لا"ء

بقت "بليز" مش "لو سمحت"ء
"لوك آت ماى جيينز ساقط لتحت"
ياريتك حتى كده و فلحت

إمعة و كمان فاشلين



آه يا دماغى آه و آه
يشكى و مين يسمع شكواه

دخل برجله سليم و كماله
طلع منها جثة فى نقاله
مستشفى دى أم مقلب زبالة

حرام عليكوا يا مفتريين



آه يا دماغى آه و آه
كلام جديد مش فهماه

يعنى إيه ديمقراطية؟؟
ششش ..دى كلمة عيب و أعجمية
رددوا ورانا ..بلدنا عظيمة و مية المية

فى الكورة دايما سابقين




آه يا دماغى آه و آه
جحا ساب مسماره وراه

مترشح ليه يا أخ جمال!!ء
عزبة بابا و ماما سوزان
شوية معيز على خرفان

شمال شمال يمين يمين



آه يا دماغى آه و آه
غازنا بتعنا و صدرناه

مالكم مين إستورده
كلها كام يوم و ينقضوا
وهنرجع تانى نستورده

وتجيا مذهب التطبيعيين



آه يا دماغى آه و آه
ماله العالم إيه اللى عماه؟؟

ملاك إسرائيل..والنبى غلبانة
وحشة غزة.. مفترية و شيطانة
ليفنى رقيقة و إنسانة

والعرب إرهابيين



آه يا دماغى آه و آه
نرجع للسور و اللى علاه

أم اليوم اللى إنتخبناه
دهس الأمل برجله و سواه
من يومها و أنا مش طيقاه

والعزبة ملت نصابين




آه يا دماغى آه و آه
كلام إتحرق ياما رددناه

طويل العمر يطول عمره.....أكتر من كده إيه؟؟
ويزهزه عصره.....هيزهزه أكتر من كده ليه؟؟
وينصره على مين يعاديه....بصراحة مش لايقة عليه؟؟
قولوا وراهم يا مساكين

آه يا دماغى آه و آه
هقولها و رزقى على الله
إمشوا فى الشارع يا عاقلين
إنسوا الفرامل و دوسوا بنزين
يسقط سور المحتلين
يسقط سور الجبناء المرعوبين
وعلاقتنا بإسرائيل
والفتن و الطائفيين
و وديع أبو المسفيين
والأحزاب أم وشين
والأغبية المتعصبين
والإمعة الفكسانين
والعالم المش معترضين
وكل اللى دايما ساكتين
أسترها معانا يا كريم
وإنتعها بالسلامة..قولوا آمين



فيشة بنت كبس